Maður var fyrir helgi sakfelldur í Héraðsdómi Norðurlands eystra fyrir alvarlegt ofbeldi gegn sambýliskonu sinni og hlaut fangelsisdóm.

Manninum var meðal annars gefið að sök að hafa grýtt glasi í átt að höfði sambýliskonu sinnar, sem á þeim tíma var ófrísk að fyrsta barni þeirra, glasið lenti á vegg við höfuð konunnar og brotnaði, með þeim afleiðingum að konan fékk marga skurði á eyra og í kringum það.

Honum var enn fremur gefið að sök á öðrum tímapunkti að hafa ráðist á konuna og kýlt hana í hægri síðu, klipið hana og sparkað í mjöðm hennar. Hlaut konan mar á síðunni og bólgu á læri auk eymsla.

Enn fremur var manninum gefið að sök að hafa reynt að ryðjast inn á heimili þar sem konan hafði leitað skjóls undan honum. Var hann vopnaður hnífi. Þegar honum var varnað því að komast inn skoraði hann á heimilisfólkið og sambýliskonu sína að koma út svo hann gæti stungið þau. Eftir að gluggi í íbúðinni brotnaði í látunum henti hann glerbrotum í fólkið og lenti eitt brotið í vinstri hendi einnar manneskju sem hlaut við það sár á fingri.

Maðurinn var enn fremur ákærður fyrir fíkniefnabrot og umferðarlagabrot.

Maðurinn var sakfelldur fyrir þessi brot. Hann á langan sakarferil að baki sem nær allt aftur til ársins 2000.

Var hann dæmdur í 18 mánaða fangelsi. Hann var dæmdur til að greiða eina milljón króna í miskabætur og tæplega 2,7 milljónir í sakarkostnað.