Efling stéttarfélag hefur tekið ákvörðun um að draga til baka samninga um leigu orlofshúsa sinna í apríl sökum heimsfaraldurs COVID-19. Hvetja þau eigendur einkabústaða til að sýna sömu ábyrgð í verki og halda sig heima um páskana.

Samkvæmt tilkynningu er um afar þungbæra ákvörðun hjá félaginu að ræða, en nauðsynleg í ljósi aðstæðna.

„Ég er mjög leið yfir að þurfa að taka þessa ákvörðun því að ég veit hvað dvölin í bústöðunum hefur mikla þýðingu fyrir mitt fólk enda hafa fæstir í hópi verkafólks aðgang að eigin bústað. Á hinn bóginn lít ég svo á að okkur beri skylda til að halda áfram að taka ábyrga afstöðu gagnvart útbreiðslu Kórónuveirunnar, eins og við í Eflingu höfum gert frá því að fyrsta tilfellið greindist á Íslandi. Því förum við að tilmælum stjórnvalda og drögum samningana til baka í þeirri von að með því gerum við okkar til að minnka hættu á slysum á þjóðvegum landsins og hægja á útbreiðslu veirunnar,“ er haft eftir Sólveigu Önnu í tilkynningu.

Sólveig Anna hvetur eigendur einkasumarbústaða til að axla sömu ábyrgð í verki og halda sig heima um páskana.

„Það er að mínu mati óásættanlegt að verka- og láglaunafólk komist ekki í orlofshús vegna faraldursins en tekjuhærra fólk geti áfram notið þeirra gæða sem fólgin eru í að komast út fyrir bæinn. Við hljótum að ætla öll að vera saman í því að hlýða tilmælum yfirvalda og halda okkur heima um páskana.“

Samkvæmt tilkynningu hefur Efling þegar sent öllum þeim félögum sem höfðu tekið hús á leigu í apríl skilaboð um ákvörðunina. Leigutökum fá endurgreitt og verður leitað leiða til að koma til móts við óskir þeirra um leigu orlofshúsa síðar á árinu.