Þórólfur Guðnason sóttvarnalæknir furðar sig á því hvað margt fólk biður um undanþágu frá sóttkví og samkomubanni. Hann bendir á að þessar aðgerðir hafi skilað okkur þeim árangri sem náðst hefur í að hefta COVID-19 faraldurinn. Mjög órökrétt sé að veita mörgum undanþágu frá sóttkví því þá sé hætta á að faraldurinn færist í aukana á ný.

Þetta kom fram á upplýsingafundi dagsins um COVID-19.

49 greindust smitaðir síðasta sólarhring sem er nokkur fækkun. 47 af 510 sýnum á veirufræðideildinni reyndust jákvæð, sem gerir 9%. Aðeins tvö af um 900 sýnum í skimum Íslenskrar erfðagreiningar reyndust jákvæð, eða 0,2%.

Ellefu eru á gjörgæslu, þar af níu í sóttkví.

Að sögn Þórólfs hafa áður verið sveiflur milli daga en líklegast sé að við séum í hægum vexti. Ekki sé hægt að slá því föstu að við séum að hægja á vextinum því áður hefur þetta sveiflast upp og niður. En þær aðgerðir sem beitt hefur verið séu augljóslega að skila árangri og sá árangur sé hvatning til að halda aðgerðunum áfram.

Af þeim sem greindust síðasta sólarhring voru 29% verið í sóttkví en það hlufall hefur oft farið vel yfir 50%.

„Við erum á lægstu spálínu líkansins hvað varðar fjölda einstaklinga. Okkur er að takast að hægja verulega á þessum faraldri en samt er mikið á lag á Landspítalanum, sérstaklega gjörgæslunni,“ sagði Þórólfur.

Samkomubann stendur til 13. apríl en Þórólfur sagði líklegt að þær aðgerðir yrðu framlengdar. Upplýst verður öðru hvoru megin við helgina hvernig framhaldið verður eftir 13. apríl.

Sjá nánar um tölfræði COVID-19 á covid.is.