Eiginkona mannsins sem greinst hefur með COVID-19 smitið er starfsmaður í Háskólanum í Reykjavík (HR).  Eins og fram hefur komið í fjölmiðlum hafa rannsóknir leitt í ljós að hún sé ekki smituð af veirunni en engu að síður dvelur hún í heimasóttkví, að ráðum landlæknis.

Starfsmönnum og nemendum í HR var greint frá þessu í tölvupósti í morgun.  Viðkomandi er þó stjórnandi í skólanum og hefur því ekki farið með kennslu.

Einn nemandi í HR sem umgengist þann sem smitaður er af veirunni, hefur verið beðinn um að fara í heimasóttkví. Nemandinn er einkennalaus og hefur ekki verið greindur með veiruna og rétt er að minnast þess að ekki er talið að smit berist frá einkennalausum einstaklingum.

HR kveðst fara eftir ráðum og leiðbeiningum landlæknis í einu og öllu. Telur landlæknir enga ástæðu til þess að láta þetta hafa áhrif á starfsemi skólans, kennslu eða viðburði.

Hóteli á Rauðarárstíg verður notað sem sóttkví fyrir þá sem mögulega eru smitaðir. Frá þessu var greint í morgun. Ekki hafa þó komið upp fleiri smit, en samkvæmt frétt Vísis er um varúðarúrræði að ræða. 49 einstaklingar hafa verið beðnir um að fara í sóttkví, bæði hér landi og erlendis, eftir að íslenski maðurinn greindist með veiruna. Var það liður í aðgerðum lögreglu við að rekja hugsanlegar smitleiðir.

Besta leiðin til að hindra framgang og smit veirunnar er að huga vel að hreinlæti og er handþvottur sérstaklega mikilvægur.

Landlæknir beinir eftirfarandi tilmælum til þeirra sem telja sig mögulega útsetta fyrir smiti:

„Einstaklingar sem finna fyrir einkennum og hafa mögulega verið útsettir fyrir smiti vegna t.d. ferðalaga eru hvattir til að hringja í síma Læknavaktarinnar 1700 (fyrir erlend símanúmer: +354 544-4113) til að fá leiðbeiningar. Þeir sem hafa verið í nánu samneyti við einstaklinga með staðfesta eða líklega sýkingu eru settir í sóttkví og hið sama á við um þá sem ferðast hafa á undanförnum dögum til skilgreindra áhættusvæða. Ítarlegar upplýsingar um hina nýju kórónaveiru er að finna á vef embættis landlæknis .“