Á síðasta ári varð ríkissjóður af 2,6 milljörðum króna vegna afsláttar sem var veittur af virðisaukaskatti á hreinorkubíla. Jökull Sólberg, ráðgjafi hjá Parallel Ráðgjöf, segir að vegna þessa gats í fjárlögunum sé ríkið í verri stöðu til að uppfylla samgöngusáttmálann sem var undirritaður á síðasta ári. Hann telur að ríkið þurfi að fjármagna þennan sáttmála og nærtækast sé að leggja á veggjöld til að mæta þessu tekjutapi.

Fréttablaðið skýrir frá þessu í dag. Haft er eftir Jökli að nú sé gulrótin komin en það þurfi prik á móti. Veggjöld séu nærtækasta leiðin til að mæta fyrrnefndu tekjutapi en það verði erfitt og óvinsælt pólitískt að innleiða þau.

2018 var tekjutap ríkissjóðs vegna umræddra afslátta um þrír milljarðar króna. Þessir afslættir eru stærsta aðgerð stjórnvalda í tengslum við orkuskipti í samgöngum.

Á síðasta ári dróst sala nýrra bíla mikið saman en um 13.600 nýir bílar seldust á árinu en voru 21.200 árið á undan og tæplega 26.000 árið 2017.

Samkvæmt aðgerðaáætlun í loftslagsmálum er gert ráð fyrir að nýskráningar bíla, sem ganga eingöngu fyrir jarðefnaeldsneyti, verði bannaðar frá 2030. Hreinorkubílar eru nú um sex prósent af bílaflota landsmanna en þegar nýskráðir fólksbílar á þessu ári eru skoðaðir eru hreinorkubílar um 45% af heildarfjöldanum.