Erlend kona, fædd árið 1983, Malgorzata Pawlewska, hefur verið dæmd í 30 daga skilorðsbundið fangelsi í Héraðsdómi Reykjaness. Dómurinn er birtur í Lögbirtingablaðinu þar sem ekki hefur tekist að ná í Malgorzötu til að birta henni dóminn. Aðeins dómsorðið er birt og því ekki hægt að slá föstu hvort Malgorzata hafi verið dæmd fyrir smygl eða eingöngu vörslu á lyfjum sem hún má ekki hafa undir höndum. En dómsorðið kveður á um að af mikið magn af lyfjum í vörslu konunnar verði gert upptækt.

Gerðar voru upptækar hjá konunni næstum 300 töflur af krabbameinslyfi og mikið magn af alls konar steralyfjum. Í dómnum er þetta orðað svo:

„Ákærða sæti upptöku á 294 töflum af Anastrozole krabbameinslyfi, 300 töflum af Oxanex, anabólískum sterum, 300 töflum af Chlorodehydomethyltestoseron, anabólískum sterum, 500 töflum af Methandienone, anabólískum sterum, 40 ml af Rapid, anabólískum sterum, 40 ml af VIR- Provigil, anabólískum sterum, 110 ml af TestoE 250, anabólískum sterum, 150 ml af SustaJect, anabólískum sterum, 180 ml af TCypion, anabólískum sterum, 80 ml af MasteronE, anabólískum sterum, 20 ml af TestoRapid, anabólískum sterum, og 30 ml af Masteron, anabólískum sterum.“

Engar upplýsingar er að finna í fljótu bragði um konuna aðrar en þær sem koma fram í dómsorðinu. Hún er ekki með íslenska kennitölu og kemur því ekki upp í þjóðskrá. Óvíst er hvort hún lesi Lögbirtingablaðið en dómurinn er birtur samkvæmt 3. mgr. 185. gr., sbr. 3. mgr. 156. gr. laga nr. 88/2008 um meðferð sakamála, sem kveður á um að birta skuli sakborningum dóma.