Líkt og hefur víða komið fram réðst hópur unglinga á fjórtán ára pilt með höggum og spörkum í Hamraborginni í síðustu viku. Árásin var tekin upp á myndband en það hefur verið í dreifingu á samfélagsmiðlum. RÚV greindi frá þessu í kvöldfréttum sínum í gær.

Faðir piltsins segir í viðtali við Fréttablaðið að hann sé ósáttur við vinnubrögð lögreglunnar. Hann telur atvikið hafa verið hatursglæp. „Hann vill ekki fara í skólann. Hann hefur orðið fyrir miklu áfalli, bæði eftir árásina og eftir að þetta fór í fréttir. Vinir hans hringdu í hann en hann skammast sín fyrir þetta. Hann þorir ekki að fara í strætó því hann er hræddur um að mæta þessum strákum aftur. Þeir hafa sent honum skilaboð. Þeir segjast ætla að ráðast á hann aftur ef hann talar við lögregluna og segjast vita hvar hann búi,“ segir faðir stráksins í samtali við Fréttablaðið.

Hann fullyrðir að lögreglan telji að sonur hans hafi skipulagt slagsmálin. „Lögreglan sagði mér að ég gæti ekkert gert vegna þess að sonur minn hafi skipulagt slaginn. Ég varð agndofa og spurði hvers vegna. Þá sagði lögreglan mér að ég gæti lagt inn kvörtun en fullvissuðu mig um að ég gæti ekkert gert. Hvers konar skilaboð eru þeir að senda þessum ungu mönnum, að þeir geti ráðist á dreng án afleiðinga?“