Björgólfur Jóhannsson, sem tók við starfi forstjóra Samherja í nóvember síðastliðnum, kveðst eiga von á því að Þorsteinn Már Baldvinsson taki aftur við starfinu í byrjun apríl.
Viðskiptablaðið greinir frá þessu og vísar í skýrslu tilnefningarnefndar Sjóvá þar sem Björgólfur er í kjöri til stjórnar. Björgólfur, sem var kjörinn í stjórn Sjóvá í mars í fyrra, fór úr stjórninni í nóvember. Í skýrslu nefndarinnar, sem Viðskiptablaðið vitnar til, segir meðal annars að hann áætli að láta af störfum hjá Samherja í lok fyrsta ársfjórðungs.
Björgólfur tók við forstjórastarfinu eftir umfjöllun Kveiks og annarra fjölmiðla um málefni Samherja í Namibíu. Til stóð að hann myndi starfa sem forstjóri meðan innanhússrannsókn á málinu fer fram. Björgólfur segir við Viðskiptablaðið að nú styttist í þá niðurstöðu og í kjölfarið muni hann hætta.
