Dagur B. Eggertsson borgarstjóri segir að borgin geti ekki fallist á launakröfur Eflingar, en það er sökum þess að menntun sé metin til launa í samfélaginu.

Félagsmenn Eflingar, mest ófaglærðar konur sem starfa á leikskólum, gripu í vikunni tvisvar til tímabundinna verkfallsaðgerða og eru fleiri fyrirhugaðar. Dagur sagði í viðtali í Silfri Egils Helgasonar í dag að staðan væri einstaklega erfið. Hann segist hafa áhyggjur af umræddri stöðu og telur að hluti vandans sé forystuleysi.

„Það er enginn að útskýra hvað verkalýðshreyfingin, vinnuveitendur og ríkisstjórnin var að gera síðasta vor. Hvað það felur í sér,“ segir Dagur, sem tekur fram að þurfi að vera ákveðið launabil í samfélaginu.

„Ef við göngum að kröfum Eflingar eins og þær eru settar fram núna erum við ekki bara að hækka laun í samræmi við lífskjarasamningana heldur til viðbótar þannig að þeir sem áttu að bíða eða fá í raun minni kjarabætur, þeir sem eru með heldur hærri laun, háskólamenntað fólk og svo framvegis, væru orðin ansi nálægt ófaglærðum í kjörum og við vitum það sem tengjast þessum samningum að það yrði aldrei samþykkt af öðrum viðsemjendum.“

Að sögn Dags greiðir Reykjavíkurborg hærri laun til ófaglærðra starfsmanna leikskóla en gert sé í öðrum sveitarfélögum. Hann segir umræðuna ekki snúast einungis um að borgin semji við Eflingur, heldur allan vinnumarkaðinn.