Ökumaður sendibifreiðar, 66 ára karlmaður sem lést í umferðaslysi á Djúpavegi í Hestfirði í júní 2018, missti stjórn a bifreiðinni og hafnaði á grjóti sem hafði fallið ofan við veginn. Talið er að hann hafi sofnað undir stýri.

Þetta kemur fram í nýrri skýrslu frá rannsóknarnefnd samgönguslysa.

Í samantekt skýrslunnar segir:

Ökumaður sendibifreiðar missti stjórn á bifreiðinni með þeim afleiðingum að hún fór út fyrir veg og lenti á stóru grjóti sem hafði fallið úr hlíð fyrir ofan veginn ofan við vatnsrás við veginn. Ökumaðurinn lést í slysinu. 

Í skýrslu segir að af hjólförum eftir bifreiðinna megi sja að henni hafi verið ekið yfir á öfugan vegarhelming út af veginum. Lenti bifreiðin á stóru grjóti með þeim afleiðingum að afturendi hennar kastast aftur upp á veginn.

Auk ökumanns var einn farþegi í sendibifreiðinni og hlaut hann töluverða áverka í slysinu. Rannsóknarnefnd samgönguslysa telur að farþeginn hafi ekki verið í öryggisbelti.

Ökumaður var hvorki undir áhrifum áfengis eða fíkniefna en þó er talið að hann hafi sofnað undir stýri og við það misst stjórn á bifreiðinni.

Rannsóknarnefnd Samgönguslysa segir í skýrslu að rétt væri að veghaldari taki til skoðunnar hvort hægt sé að takmarka hættu af grjóthruni fyrir ofan veginn.  Eins kemur fram að veghaldari hafi vitað af grjótinu sem sendibifreiðin hafnaði á, og stóð til að fjarlægja það.