Íslendingar mæta Ungverjum í dag kl. 17:15 í lokaleik liðanna í E-riðli á EM. Leikurinn fer fram í Malmö eins og aðrir leikir Íslands til þessa. Ísland er komið áfram í milliriðil en ef Ísland sigrar Ungverjaland í dag tökum við tvö stig með okkur í milliriðilinn – gífurlega mikilvæg stig sem geta ráðið miklu um framhaldið.

Íslendingar verða í milliriðli með Noregi, Portúgal, Svíþjóð og Slóveníu, auk þess liðs sem fer með okkur, Ungverjaland eða Danmörk. Tvö efstu liðin í milliriðlinum komast í undanúrslit. Þetta eru allt lið sem Ísland hefur unnið á undanförnum árum. Ekkert segir að við getum ekki lagt þau að velli núna.

Þjálfari Ungverjalands, Isvan Gulyas, segir í viðtali við RÚV að Íslendingar spili öfluga og flókna vörn. Hann býst við mjög erfiðum leik en trúir á sigur.

Guðmundur Guðmundsson, þjálfari Íslands, segir í viðtali við RÚV að Ungverjar hafi reynst Íslendingum ákaflega erfiðir í gegnum tíðina. Ungverjar hafi spilað frábærlega í jafnteflisleik gegn Dönum. Guðmundur segir að planið sé að keyra upp hraðaupphlaup gegn Ungverjum og reyna að ná góðu forskoti snemma.