Mjög hvasst er víða á landinu enda appelsínugular viðvaranir í gildi á Breiðafirði, Vestfjörðum, Ströndum og Norðurlandi vestra, Suðausturlandi og Miðhálendi.
Einna mestur hefur vindurinn verið í Sandfelli í Öræfum og er meðalvindhraði þar um 28 metrar á sekúndu. Í morgun fóru vindhviður í 57,9 metra á sekúndu. Síðdegis í gær fóru hviður einnig í nokkur skipti yfir 50 metra á sekúndu.
„Hvergi er meira um hættulega sviptivinda hér á landi en við hæstu og bröttustu fjöllinn. Annars vegar við Öræfajökul og hins vegar undir Eyjafjöllum. Já þeir eru hættulegir og þess vegna verður að grípa til þess ráðs að loka þjóðveginum þegar aðstæður skapast, jafvel þó vegur sé auður,“ segir í færslu Einars Sveinbjörnssonar veðurfræðings á vefnum Blika.is þar sem fjallað er um óveðrið á landinu og vindhviðurnar í Sandfelli.
Veðurstofan varar við því að ekkert ferðaveður er á þeim slóðum þar sem appelsínugul viðvörun er í gildi.
