Umferðarslys varð á Hafnarfjarðarvegi við Arnarnesveg upp úr miðnætti í gærkvöld þegar ökumaður missti stjórn á bifreið sinni með þeim afleiðingum að hún endaði á ljósastaur.
Farþegi í bifreiðinni var fluttur á slysadeild til aðhlynningar, en bifreiðin skemmdist þó nokkuð og var óökufær á eftir.
Í skeyti frá lögreglunni á höfuðborgarsvæðinu kemur fram að rannsókn málsins sé í gangi en grunur leikur á að um hraðakstur hafi verið að ræða sem olli því að ökumaður missti stjórn á bílnum.
Nóttin var að öðru leyti tíðindalítil hjá lögreglunni. Einn var þó handtekinn vegna gruns um rúðubrot í Bæjarlind upp úr miðnætti og þá var einn handtekinn á Miklubraut rétt fyrir klukkan tvö í nótt vegna gruns um akstur undir áhrifum fíkniefna.
Þá var lögreglu tilkynnt um þjófnað úr verslun á Vesturlandsvegi og voru höfð afskipti af einum aðila nokkru síðar. Maðurinn viðurkenndi þjófnaðinn og var vörunum komið til skila.