Ragnar S. Halldórsson, fyrrverandi forstjóri og stjórnarformaður Íslenska álfélagsins, er látinn. Morgunblaðið og Hringbraut greina frá láti hans.
Ragnar lést á Landspítalanum í Fossvogi miðvikudaginn 7. ágúst, 89 ára að aldri.
Hann var fæddur í Reykjavík þann 1. september árið 1929. Eftirlifandi eiginkona hans er Margrét Kristín Sigurðardóttir viðskiptafræðingur. Ragnar lætur eftir sig fjögur börn, þau eru: Kristín Vala, prófessor við Háskóla Íslands, Halldór Páll, forstjóri verktakafyrirtækisins Pihl&Søn í Danmörku, Sigurður Ragnar, forstjóri ÍAV, og Margrét Dóra, sjálfstætt starfandi tölvu- og sálfræðingur.
Ragnar lauk M.Sc.-prófi í byggingaverkfræði frá DTH í Kaupmannahöfn árið 1956. Það sama ár hóf hann störf hjá Bandaríkjaher á Keflavíkurflugvelli og var yfirverkfræðingur og síðar framkvæmdastjóri verkfræðideildar sjóhersins.
Árið 1966 flutti Ragnar af landi brott og hóf störf hjá Swiss Aluminium í Sviss og Austurríki. Í framhaldi af því, árið 1969, tók hann við starfi forstjóra álvers ÍSAL í Straumsvík. Starfinu gegndi Ragnar til ársins 1988 og eftir það gegndi hann stöðu formanns stjórnar ÍSAL um skeið.