„Ég hvet fólk til að læsa útidyrum og líka að setja upp einfaldar eftirlitsmyndavélar,“ segir Jón Gnarr, fyrrverandi borgarstjóri.

Myndband sem Sigurður Þór Helgason, íbúi í Vesturbænum, birti á Facebook-síðu sinni um helgina vakti mikla athygli en á því mátti sjá bréfbera reyna að fara inn í hús Sigurðar í skjóli nætur. Á myndbandinu sést þegar einstaklingurinn tekur í hurðarhúninn, skömmu eftir að hann rennir Fréttablaðinu inn um lúguna.

Jón Gnarr deildi frétt Vísis af málinu á Facebook-síðu sinni í gærkvöldi og rifjaði upp óþægilegt atvik sem átti sér stað á heimili hans.

Brugðu sér frá í nokkra klukkutíma

„Fyrir nokkrum árum var brotist inn heima hjá okkur. Þetta var á föstudagseftirmiðdegi. Við höfðum brugðið okkur frá í nokkra klukkutíma og skilið útidyrnar eftir ólæstar. Einhver fór inn á stigaganginn, stal úr vösum og tók tölvu sem sonur minn hafði skilið eftir,“ segir Jón í færslunni.

„Þetta var svo dularfullt. Útidyrnar okkar eru bakdyr og ekki sérstaklega aðgengilegar, það kemur sjaldnast nokkur að þeim nema eiga erindi. Það var svo 2-3 vikum seinna sem ég sat heima og heyrði að póstur var settur innum lúguna mína og þá allt í einu lagði ég saman 2 og 2. Verið var að bera út dagblað sem hætt er að koma út en helgarblaðið kom einmitt um seinnipart föstudags. Blaðburðarmaðurinn var greinilega að tékka á mannaferðum og athuga hvort hurðir væru læstar þegar hann fór um með blöðin,“ segir hann.

Setti upp ódýra eftirlitsmyndavél

Í færslunni segist hann hafa haft samband við lögreglu sem talaði við umræddan einstakling. Jón segir að þar sem hann neitaði hafi lögregla ekki getað aðhafst frekar í málinu. Jón segist hvetja fólk til að læsa útidyrum en einnig segir hann einfalt að setja upp eftirlitsmyndavél.

„Það er til dæmis hægt að nota gamla síma og setja í þá ókeypis öpp. Ég geri það. Ég er með Presence og gamlan iphone útí glugga og ef einhver er að sniglast í kringum heimili mitt þá fæ ég notification með mynd.“

Í samtali við Morgunblaðið í gær sagðist Sigurður Þór hafa birt myndbandið í þeim tilgangi að hvetja fólk til að læsa. „Ég fékk bara áfall. Þegar maður er með fjöl­skyldu, börn og verðmæti þarna inni geng­ur þetta mjög nærri manni. Ég svaf ekk­ert alla nótt­ina eft­ir að hafa séð þetta mynd­band,“ sagði hann. Líkt og í tilfelli Jóns segir Sigurður að lögregla hafi ekkert gert þar sem ekki sé um eiginlegt lögbrot að ræða að taka í hurðarhúninn.