Samkvæmt frétt á vef Landlæknisembættisins er staðfest E. coli STEC  sýking hjá einu barni í dag en 13 sýni voru rannsökuð. Barnið er eins og hálfs árs.

Þar með hafa alls 17 börn verið greind með E. coli sýkinguna en hún kom á þjónustubænum Efstidal II í Bláskógarbyggð í Árnessýslu. Barnið er í eftirliti á Barnaspítala hringsins.

Fram kom í hádegisfréttum RÚV í dag að öll börnin sem hafa verið greind eru íslensk og langflest þeirra eru búsett á höfuðborgarsvæðinu. Landlæknisembættið er í reglulegu sambandi við Alþjóðaheilbrigðisstofnunina og evrópsku sóttvarnarstofnunina til að láta vita af faraldrinum hér, sem er án fordæma.

Fólk getur smitast af E. coli STEC með menguðum matvælum eða vatni, með beinni snertingu við dýr eða mengaðan úrgang dýra. Bakterían kemst þannig um munn og niður í meltingarveg og framleiðir eiturefni sem getur valdið blóðugum niðurgangi og í alvarlegum tilfellum nýrnabilun og blóðleysi.