Karlmaður var á mánudag dæmdur fyrir að nauðga meðvitundarlausum kunningja sínum. Hann hringdi á meðan verknaðinum stóð í vinkonu sína á Skype og sýndi henni ofbeldið.
Var hann einnig dæmdur fyrir að slá annan mann í andlitið sem hlaut af því opið sár.
Frá þessu er greint í Fréttablaðinu en dómurinn var kveðinn upp í Héraðsdómi Vestfjarða. Dómurinn hefur ekki verið birtur.
Nauðgunin átti sér stað á heimili hins ákærða árið 2016. Segir í dómnum að mennirnir hafi báðir verið í mikilli neyslu á þessum tíma. Hinn ákærði hætti hins vegar neyslu árið 2017. Hann neitaði sök í málunum báðum en var sakfelldur og hlaut tveggja ára skilorðsbundið fangelsi. Hann var dæmdur til að borga manninum sem hann nauðgaði eina milljón króna og þolanda líkamsárásarinnar 200 þúsund krónur.