„Bjarni Benediktsson hefur fyrir löngu fellt grímuna. Hann þarf hana ekki. Í íslenskum stjórnmálum er ekkert, alls ekkert, sem stoppar Bjarna eða vilja hans.“

Þetta segir Sigurjón M. Egilsson, ritstjóri Miðjunnar og fréttastjóri til margra ára, í pistli á vef sínum. Þar gerir hann upp atburðarásina á Alþingi að umtalsefni. Ekki hefur náðst samkomulag um þinglok en í frétt RÚV í gærkvöldi var greint frá því að ein ástæða þess væri sú að Bjarni Benediktsson, formaður Sjálfstæðisflokksins, hefði hafnað samkomulagi sem átti að gera við Miðflokkinn.

Sigurjón, sem stýrði stjórnmálaþættinum Sprengisandi á Bylgjunni í mörg ár, er býsna harðorður í garð Bjarna í pistli sínum.

„Bjarni hætti að pukrast með hagsmunagæsluna þegar hann setti Kristján Þór í stól sjávarútvegsráðherra, fyrrverandi formann Samherja. Stærstu útgerðar landsins. Síðan hafa veiðigjöld verið lækkuð svo um munar. Allt gengur upp hjá Bjarna,“ segir hann og bætir við:

„Katrín Jakobsdóttir er eitt fórnarlamba Bjarna. Katrín varði löngum tíma í samningaviðræður við Sigmund Davíð um þinglok. Bjarni hélt sig fjarri en sendi Birgi Ármannsson á þá fundi sem Bjarna var ætlað að sitja.

Katrín náði samkomulagi við Sigmund Davíð um framhaldið á Alþingi. Bjarni beitti fjarstýringunni á Katrínu og Alþingi allt. Hann sagði bara nei, Og sú er staðan. Bjarni opinberar það sem hann vill. Nú opinberaði hann yfirburði sína yfir Katrínu og öllum öðrum í þinghúsinu. Það er bara einn aðal. Það er bara einn Bjarni Benediktsson.“

Sigurjón segir að flestir Íslendingar hafi gert sér vonir um Katrínu, sem hafi lengi vel verið vinsælust íslenskra stjórnmálamanna – vonir sem ekki hafi ræst. „Bjarni gerði sér aðrar vonir um Katrínu, vonir sem hafa allar ræst. Og Bjarni fagnar.“