„Málið varðar umsókn einstaklings sem gegnt hefur tímabundinni stöðu við skólann um ótímabundna ráðningu. Umsókn þar að lútandi er í viðeigandi ferli innan skólans en endanleg ákvörðun liggur ekki fyrir. Að öðru leyti tjáir háskólinn sig ekki um málefni einstakra starfsmanna en vísar í reglur Háskóla Íslands um framgang og ótímabundnar ráðningar akademískra starfsmanna,“ segir Jón Atli Benediktsson, rektor háskóla Íslands um meintan brottrekstur Helga Áss Grétarssonar, dósents við lagadeild HÍ (og skákmanns).

Eins og komið hefur fram í frétt DV og á öðrum miðlum telur Helgi að sér hafi verið sagt upp störfum á grunni þess að hann sinni rannsóknum og ritsmíðum ekki nægilega vel. Samkvæmt rektori er málið þó engan veginn útkljáð heldur er um að ræða bráðabirgðaniðurstöðu sem Helgi hefur andmælarétt við.

Um starfslok sín skrifaði Helgi eftirfarandi pistil:

STARFSLOK

Fyrirsjáanlegt er að ég mun láta af störfum sem dósent við lagadeild Háskóla Íslands hinn 30. júní næstkomandi. Þessi starfslok eiga sér sinn aðdraganda og munu sjálfsagt eiga sín eftirmál. Síðar verður frekari ljósi varpað á þau málefni. Hins vegar á þessu stigi málsins vil ég þakka öllum sem ég hef átt samstarf við á vettvangi háskólasamfélagsins undanfarin 13 ár og sérstaklega er mér hlýtt til allra þeirra sem sinntu námi undir minni leiðsögn. Háskólakennsla getur verið gefandi starf og kennsluhættir í laganámi eiga að vera lifandi og fjölbreyttir. Vonandi eru sem flestir nemendur ánægðir með mig sem kennara. Ég hlakka til að nýta þá reynslu sem ég hef öðlast við Háskóla Íslands í þeim verkefnum sem ég hyggst taka að mér á næstu misserum.