Vilhjálmur Birgisson, formaður Verkalýðsfélags Akraness og 1. varaforseti ASÍ, fagnar mjög þeirri ákvörðun peningastefnunefndar Seðlabankans að lækka stýrivexti.

Ákvörðun bankans var tilkynnt í morgun og lækka vextir bankans um 0,5 prósent. Meginvextir bankans, það er vextir á sjö daga bundnum innlánum, verða því fjögur prósent.

Vilhjálmur segir á Facebook-síðu sinni að þessi ákvörðun verði til mikilla hagsbóta fyrir íslensk heimili og fyrirtæki.

„Ég sagði þegar við vorum í kjarasamningsslagnum að eitt af brýnustu hagsmunamálum okkar væri að ná niður okurvöxtum fjármálakerfisins og núna hefur okkur tekist það að hluta til með lífkjarasamningum,“ segir Vilhjálmur sem gefur svo dæmi um það hvað vaxtalækkunin þýðir.

„Þetta þýðir að ráðstöfunartekjur heimila sem skulda 30 milljónir í húsnæðislán og eru með breytilega vexti geta aukist um 150 þúsund krónur á ársgrundvelli eða sem nemur 12.500 krónum á mánuði. Mikið er ég glaður með að loksins sér Seðlabankinn að sér og lækkar vextina okkur öllum til hagsbóta.“