Tímaritið GQ fjallaði ítarlega á dögunum um Bitcoin-málið svokallaða og sérstaklega um flótta Sindra Þórs Stefánssonar. Í þeirri grein kemur þó ýmislegt fram ótengt því máli en blaðmenn ræddu meðal annars við Annþór Kristján Karlsson og sagði hann þeim það sem mætti kalla bransasögur úr undirheimunum.

Annþór, var töluvert í fréttum á sínum tíma fyrir handrukkun. Hann var síðast dæmdur undir lok árs 2012  í sjö ára fangelsi fyrir hættulegar líkamsárásir. Í fyrra sagðist hann þó í samtali við DV á beinu brautinni, hann væri á fullu í vinnu eftir að hann losnaði við ökklabandið í desember 2017.

Í viðtalinu við GQ viðurkennir Annþór fúslega að hafa staðið að innflutningi á fíkniefnum til Íslands á árum áður. Hann segir að þrátt fyrir að hafa flutt inn hundruð kílóa af kókaíni og amfetamíni þá hafi hann ekki verið neinn stórlax. Annþór segir að ofbeldi hafi verið og sé enn sjaldgæft. Að hans sögn sjái undirheimarnir að mestu sjálfir um löggæslu, ef svo má að orði komast.

Til marks um þetta segir hann sögu frá tíunda áratugnum, en Annþór segir að þá hafi víetnamskt glæpagengi reynt að flytja inn heróín til landsins. „Við lúbörðum þá, tókum draslið og hentum því í ruslið […] Við vildum ekki heróín á okkar markaði. Því við búum í litlu landi, þar sem allir þekkja hvorn annan,“ er haft eftir Annþóri. Hann bætir svo við: „Það er enginn einn kóngur. Við erum með marga smákónga.“

Þetta er þó ekki það eina sem Annþór upplýsir í viðtalinu en þar útskýrir hann, nokkuð ítarlega, hvernig hann flutti inn dóp. Hann segist hafa stundað það í um tvo áratugi. Fyrstu um sinn hafi hann aðallega notast við gámaflutninga, hann hafi afhent hafnarverkamanni í Rotterdam pakka og svo einfaldlega sótt þann sama pakka í Reykjavík.

Í viðtalinu segir Annþór að eftir að hann var gómaður árið 2004 þá hafi hann fundið nýja leið. „Ég setti dópið í box og póstlagði svo pakkann á einhver, hvern sem er því það skipti ekki máli. Síðan var maður sem vann á UPS sem tók pakkann,“ segir Annþór í greininni sem má lesa í heild sinni hér.