Á fyrsta tímanum í nótt var maður handtekinn í íbúð í Hafnarfirði en þar var hann ekki velkominn. Maðurinn var í mjög annarlegu ástandi og neitaði að yfirgefa íbúðina og ógnaði húsráðendum með hafnaboltakylfu.

Á sjöunda tímanum í gær var tilkynnt um þjófnað úr starfsmannaaðstöðu opinberrar stofnunar í Háaleitis- og Bústaðahverfi. Miklu var stolið. Lögreglan handtók meintan þjóf síðar og endurheimti þýfið og endaði hinn meinti þjófur í fangageymslu þar sem hann bíður yfirheyrslu.

Á tíunda tímanum í gærkvöldi voru skemmdarverk unnin á bifreið í Garðabæ og skráningarmerkjunum stolið af henni. Ákveðinn aðili liggur undir grun.

6 ökumenn voru handteknir í gærkvöldi og nótt grunaðir um akstur undir áhrifum fíkniefna og/eða áfengis. Allir nema einn voru látnir lausir að sýnatöku lokinni. Þessi eini var vistaður í fangageymslu þar sem hann var ofurölvi.