Góða daginn, gæti einhver sagt mér söguna um alla brjóstahaldarana sem hanga á leið til Vík, svona hljómaði fyrirspurn inn á Facebook síðunni Bakland ferðaþjónustunnar.  Enda góð spurning. Hvers vegna hanga þessir brjóstahaldarar þarna, og hvaðan koma þeir ?

Í einu svari við fyrirspurninni var þeirri kenningu varpað fram að brjóstahaldarar tengdust bólförum bóndans.

„Það er einn fyrir hverja konu sem bóndinn á bænum hefur náð að….“

Aðrir vildu halda því fram að þetta væri rusl, ósiður og vanvirðing við umhverfið. En síðan skýrðust aðstæður þegar einn benti á að Vísir hefði árið 2017 fjallað um yfirgefnu brjóstahaldarana.

Þar kom fram að um hefð er að ræða sem kemur frá öðrum eiganda jarðarinnar Brekkukot, Þórhalli Birgissyni, sem fékk þessa hugmynd í samráði við Önnu Birnu Þráinsdóttur sem þá var sýslumaður á Suðurlandi.

„Eina kvöldstund sat maðurinn minn með sýslumanninum, frú Önnu Birnu Þráinsdóttur, og þeim datt þetta snilldarráð í hug og svo hefur verið að bætast á girðinguna í gegnum tíðina,“ sagði Lilja Georgsdóttir, hinn eigandi Brekkukots, í samtali við Vísi.

Lilja sagðist hafa grínast með það að þeir sem stoppi til að taka myndir séu skyldugir til að skilja eftir brjóstahaldara. Hún sjálf sé þó löngu orðinn brjóstahaldaralaus þar sem þeir hafi allir endað á girðingunni.

„Þetta var bara hugsað fyrir skemmtilegheitin. Í staðinn fyrir að hengja sokka á girðinguna, eins og maður hefur séð, var ákveðið að velja brjóstahaldarana.“

Ljóst er að hefðin er að festast vel í sessi og tveimur árum eftir umfjöllun Vísis hefur bæst verulega í brjóstahaldaraflóruna.