Sólveig Anna Jónsdóttir, formaður Eflingar, fór með bæn áður en hún fór að sofa í gærkvöldi. Sólveig Anna segir frá þessu á Facebook-síðu sinni og birtir um leið umrædda bæn sem sjá má hér að neðan.
„Þetta er litla bænin mín sem ég ætla að fara með núna áður en ég sofna:
Elsku guð, viltu hjálpa Íslandi að halda áfram að passa að ríku mennirnir haldi áfram að vera ríkir og fólkið sem fær 340.000 krónur útborgaðar á mánuði haldi áfram að fá 340.000 krónur útborgaðar á mánuði? Afþví að að annars gæti eitthvað mjög hræðilegt gerst eins og td. að smálánafyrirtæki hættu að græða og fólk þyrfti ekki að vera með áhyggjur og öll börn gæru alist upp í skjóli efnahagslegs öryggis og margt fleira sem er vont. Viltu hjálpa láglaunafólkinu að skilja að þeirra er ábyrgðin og stöðugleikinn svo að allt þetta vonda gerist ekki?
Takk fyrir, guð og áfram Ísland.“
Sólveig Anna hefur staðið í ströngu að undanförnu enda hafa kjaraviðræður gengið erfiðlega.
Sólveig birtir með bæninni skjáskot af umfjöllun Stundarinnar um Pál Sigurjónsson, hótelstjóra KEA. Í fréttinni sem birtist á vef Stundarinnar í gær kom fram að hann hefði grætt ævilaun launþega á lágmarkslaunum árið 2017. Það ár hagnaðist hann um rúmar 170 milljónir króna inni í eignarhaldsfélagi sínu. Hann hafði þá selt hlutabréf í hótelinu til erlendra fjárfesta.
