Lögreglan á Suðurnesjum stöðvaði um 150 bifreiðir á Reykjanesbraut við Innri – Njarðvík í gærkvöld í hefðbundnu umferðareftirliti. Í skeyti frá lögreglu kemur fram að allir ökumenn hafi reynst hafa sitt á hreinu nema einn sem ók sviptur ökuréttindum.
Þá segir lögregla að á undanförnum dögum hafi á annan tug ökumanna í umdæminu verið kærðir fyrir of hraðan akstur. Sá sem hraðast ók mældist á 151 kílómetra hraða þar sem hámarkshraði er 90 kílómetrar á klukkustund. Annar ökumaður var grunaður um ölvunarakstur.
Þá voru skráningarnúmer fjarlægð af sex bifreiðum sem voru óskoðaðar eða ótryggðar og tveir óku án ökuréttinda.
