Sáttanefnd er nú að störfum á vegum ríkissins en hún á að reyna að ná sáttum um bætur til þeirra sem voru sýknaðir síðasta haust í Guðmundar- og Geirfinnsmálunum. Ekki er talið útilokað að bæturnar geti hlaupið á milljörðum króna.

Málið er án fordæma í íslenskri réttarsögu og því ekki auðvelt fyrir samningsaðila að gera sér grein fyrir hvernig bótamál myndi fara ef það verður rekið fyrir dómstólum. Fréttablaðið skýrir frá þessu í dag.

Kristján Viðar Júlíusson, Guðjón Skarphéðinsson og Albert Klahn Skaftason eru allir á lífi en þeir voru sýknaðir í málinu síðastliðið haust. Þeir eiga allir hlutlægan bótarétt vegna frelsiskerðingar að ósekju segir í umfjöllun Fréttablaðsins.

Katrín Jakobsdóttir, forsætisráðherra, hefur lagt áherslu á að sáttum verði náð við þá sem og aðstandendur Sævars Marinós Ciesielksi og Tryggva Rúnars Leifssonar en þeir eru látnir.

Fréttablaðið segir að miðað við tvo dóma sem hefur verið vísað til sem fordæma um bótagreiðslur þá geti upphæðirnar hlaupið á milljörðum.

Blaðið segist hafa heimildir fyrir að einn viðsemjenda sáttanefndarinnar hafi lagt útreikning bóta á grundvelli þessara fordæma fyrir nefndina auk útreiknings á bótum vegna tekjumissis.

Fréttablaðið segir að miðað við þessi fordæmi gætu aðstandendur Sævars Ciesielski krafist 685 milljóna í bætur, aðstandendur Tryggva Rúnars Leifssonar 491 milljóna, Kristján Viðar Júlíusson gæti krafist 607 milljóna, Guðjón Skarphéðinsson 403 milljóna og Albert Klahn Skaftason 40 milljóna.