Lögreglumenn sem voru í eftirlitsferð í miðborg Reykjavíkur rétt fyrir klukkan sex í morgun komu konu til aðstoðar sem lá á götunni.
Í dagbók lögreglu segir að maður hafi veifað til lögregluþjónanna klukkan 05:45 í morgun og bent þeim á konuna. Hún var illa klædd, lá á gangstéttinni og segir lögregla hana hafa verið ósjálfbjarga vegna kulda. Sjúkrabíll var strax kallaður á vettvang og var konan flutt á bráðamóttökuna í Fossvogi.
Ekki liggja fyrir frekari upplýsingar um líðan konunnar.
Þá segir lögregla að rúðubrot hafi verið tilkynnt til lögreglu í miðborginni í morgun. Rétt fyrir klukkan átta var tilkynnt um rúðubrot í bifreið og klukkan rúmlega tíu í morgun var tilkynnt um rúðubrot í að minnsta kosti fjórum bifreiðum í miðborginni. Málið er í frumrannsókn, að sögn lögreglu.