Laust fyrir klukkan fjögur í nótt var drukkin kona handtekin við veitingahús í miðborginni. Konan er grunuð um að hafa ráðist á gesti og starfsfólk veitingahússins. Hún neitaði aðspurð að gefa lögreglu upp nafn sitt eða kennitölu og var vistuð fyrir rannsókn málsins í fangageymslu lögreglu.

Þetta kemur fram í dagbók lögreglunnar en einnig það að mörg umferðaróhöpp áttu sér stað í gærdag og gærkvöld:

Í eftirmiðdaginn í gær var tilkynnt um umferðarslys í Hafnarfirði en bíl var ekið aftan á bíl sem var kyrrstæður við gangbraut. Ökumaður bílsins sem ók aftan á reyndist vera án ökuréttinda. Slys á fólki voru minniháttar.

Stuttu síðar var tilkynnt um útafakstur á Hafnarfjarðarvegi en bíllinn hafnaði á vegriði. Bíllinn er óökufær eftir óhappið. Ekki er vitað um meiðsl á ökumanninum.

Klukkan hálfníu í gærkvöld var tilkynnt um umferðarslys í Kópavogi og voru þrír fluttir á slysadeild vegna meiðsla.

Stuttu síðar varð annað umferðarslys í Kópavogi. Skemmdur bíll var fluttur af vettvangi en engin meiðsl urðu á fólki. Nokkrir menn eru í haldi vegna málsins en þeir reyndu að flýja af vettvangi.

Kl.21:49 var tilkynnt um bílveltu í Kollafirði. Ökumaður var fluttur af lögreglu á slysadeild til skoðunar, að því loknu var viðkomandi vistaður í fangageymslu vegna rannsóknar málsins en grunur er um að hann hafi ekið undir áhrifum fíkniefna eða lyfja. Bíllinn var fluttur af vettvangi með dráttarbíl.