Kona og karlmaður á gráum Volkswagen sendibíl reyndu að brjótast inní hús í Mosfellsbænum í morgun, nánar tiltekið í Reykjabyggðinni. Að sögn íbúa í hverfinu hefur nokkuð verið um innbrot í Mosfellsbæ að undanförnu. Að sögn viðkomandi íbúa í þessu máli tókst nágrönnum að koma í veg fyrir að innbrotið tækist. Konan skrifar í FB-hópinn Íbúar í Mosfellsbæ – umræðuvettvangur:

„Rétt fyrir kl. 11 í morgun var gerð tilraun til að brjótast inn hjá okkur í Reykjabyggðinni! Grár WV Transporter sendibíll. Þökk sé góðri nágrannavörslu náðist ekki nema að spenna upp glugga!“

Konan náði niður bílnúmerinu og er sendibíllinn í eigu erlends manns. Hún sagði í samtali við DV:

„Nágranni hringdi í okkur, þetta voru maður og kona, hann gekk á allt húsið, náði að spenna upp glugga. Erlendur aðili sem er skráður fyrir bílnum en hann er búinn að búa hér lengi að við teljum. Hann segist hafa lánað bílinn og honum líklega verið stolið frá þeim aðila.“

Í umræðum um málið í Facebook-hópnum er kallað eftir öryggismyndavélum á svæðið. Ljóst er hins vegar að góð nágrannavarsla kemur sér vel og kom að þessu sinni í veg fyrir innbrot.

UPPFÆRT: Lögregla hefur fundið bílinn og parið. Ekki liggja fyrir frekari upplýsingar um fólkið.