Sigurður G. Steinþórsson gullsmíðameistari segir frá sorglegu atviki sem ku hafa gerst á laugardag á Laugaveginum innan Facebook-hópsins Opnum Laugaveginn og Skólavörðustíginn. Markmið hópsins, líkt og nafnið gefur til kynna, er að berjast gegn lokun umferðar á umræddum götum.

Sigurður vandar meirihluta borgarstjórnar ekki kveðjurnar og segir hann hafa eyðilagt jólin fyrir ungri fjölskyldu. Hann segir að þau hafi misst af jólalest Kókakóla vegna lokunar Laugavegsins. „Varð vitni að því í eftirmiðdag í gær laugardaginn 7. desember að ungt par með tvö börn stóð fyrir framan verslunina okkar um kl.17:30 og virtist vera að bíða eftir einhverju, norpandi í kuldanum. Tuttugu mínútum síðar fór ég út og bauð þeim inn í hlýja verslunina og spurði eftir hverju þau væru að bíða og hvort ég gæti eitthvað liðsinnt,“ segir Sigurður en verslun hans, Gull og Silfur, er rétt hjá Kjörgarði á Laugaveginum.

Svo kom í ljós að þau voru að bíða eftir jólalestinni. „Þau sögðust vera að bíða eftir Kókakóla jólalestinni sem hefði átt að vera a Laugaveginum kl.17:30 samkvæmt akstursplani sem að þau sýndu okkur. Ég sagði þeim að engin Kókakóla-jólalest færi lengur um gamla góða Laugaveginn eins og áður, því núverandi meirihluti borgarstjórnar væri búin að loka götunni fyrir slíku, til að skapa „manneskjulega“ lifandi stemmingu í miðborginni,“ skrifar Sigurður.

Sigurður fullyrðir að börnin hafi verið miður sín. „Foreldrar barnanna sögðust hafa farið með sínum foreldrum niður á Laugaveg á sínum tíma og horft á ljósin og hlustað á háværa jólatónlist frá jóla-Kókakólalestinni. Þetta hefði í gegnum árin verið eitt af upphafsatriðum jólaundirbúningsins þeirra. Börnin voru með tárin í augunum, eitthvað hafði verið eyðilagt. Þökk sé þeim sem ráða og vita betur,“ segir Sigurður.

Þess má geta að Jólalestin fór um Hlemm á umræddum tíma, ríflega hálfum kílómetra ofar Laugaveginn.