Barn varð undir afturhjóli pallbifreiðar á bifreiðastæði við sveitabæ í Árnessýslu á föstudag. Þetta segir í dagbók lögreglunnar á Suðurlandi.

Slysið varð með þeim hætti að bifreiðinni var ekið afturábak og varð barnið undir afturhjólinu. Í skeytinu segir að barnið hafi verið flutt á sjúkrahús í Reykjavík en sem betur reyndust áverkarnir minniháttar og var barnið sent heim að skoðun lokinni.

Alls urðu þrettán umferðaróhöpp í umdæmi lögreglunnar og í tveimur þeirra urðu meiðsl á fólki. Annarsvegar þann 4. desember en þá bilaði stýrisbúnaður bifreiðar á vesturleið í Hveradalabrekku með þeim afleiðingum að hún lenti út í vegriði.

Ökumaður annarrar bifreiðar stöðvaði bifreið sína fyrir framan þessa bifreið og fór til aðstoðar við ökumann hennar. Ökumaður þriðju bifreiðarinnar sem þarna kom við sögu dró úr hraða sinnar bifreiðar þegar hann hugðist aka framhjá en þá vildi ekki betur til en svo að fjórða ökutækið, vörubifreið með vagni, náði ekki að draga nægjanlega úr ferð og lenti aftan á henni og kastaði á bifreið þess sem í upphafi hugðist aðstoða þann ólánssama í vegriðinu.

Ökumaður bifreiðarinnar sem vörubifreiðin lenti á var fluttur til aðhlynningar á sjúkrahús í Reykjavík. Aðrir sluppu ómeiddir, þar á meðal hross sem voru á vagni vörubifreiðarinnar. Snjókoma var á vettvangi og snjóþekja með tilheyrandi hálku á veginum.