Lögreglan á höfuðborgarsvæðinu kom konu í miðborginni til aðstoðar í morgun en konan hafði lokast úti meðan hún fór út með ruslið.
Tilkynning barst klukkan rétt rúmlega níu í morgun en í skeyti frá lögreglu segir að konan hafi ekki haft lykla eða farsíma á sér og var barn hennar, sem er fætt árið 2019, eitt inni í íbúðinni.
Lögreglumönnum tókst að opna hurðina fyrir konuna.
Morguninn hefur verið rólegur í umdæmi lögreglunnar. Tilkynnt var um eitt innbrot í miðborginni í morgun en þar hafði verið brotin rúða og farið inn. Fartölvu var meðal annars stolið. Þá var bifreið stöðvuð á Reynisvatnsvegi. Bílrúður voru hélaðar og er ökumaðurinn grunaður um akstur undir áhrifum fíkniefna.
