Stjórnendur og stofnendur lággjaldaflugfélagsins Play hafa boðist til að minnka hlut sinn í 30 prósent. Þetta myndi þýða að þeir fjárfestar sem fást til að leggja félaginu 1,7 milljarða króna í hlutafé fengju 70 prósenta eignarhlut.
Þetta kemur fram í Markaðnum í dag.
Eins og greint var frá á blaðamannafundi í byrjun nóvember, þar sem stofnun félagsins var kynnt, stóð til að stofnendur og stjórnendur félagsins ættu helmingshlut á móti fjárfestum. Að því er fram kemur í Markaðnum hafa þær hugmyndir mætt mikilli andstöðu á fundum sem haldnir hafa verið með fjárfestum og fyrirtækjum.
Til að koma til móts við þessa gagnrýni hafa forsvarsmenn Play boðist til að minnka sinn hlut og freista þess þannig að fá fjárfesta að félaginu. Upphaflega stóð til að byrja að selja flugmiða nú um mánaðarmótin en nú vonast forsvarsmenn fyrirtækisins til þess að það muni takast fyrir áramót.