Eiríkur Jónsson greinir frá því á vefsíðu sinni að minnstu hafi munað að til átaka kæmi í Costco nýverið. Hann birtir mynd máli sínu til stuðnings. Samkvæmt Eiríki þá hófst atvikið með því að tvær íslenskar konur kölluðu að tveimur múslímskum konum sem þar voru að versla.

„Málsatvik voru þau, að sögn sjónvarvotta sem voru fjölmargir, að íslensku konurnar höfðu komið sér fyrir í hægindastólum sem til sölu eru í versluninni þegar múslimakonurnar, með slæður sínar, áttu leið framhjá. Hófu þær íslensku þá köll að þeim með tilheyrandi rasískum dónaskap: „Go home you bloody muslims! We are not going to pay for you no more!“ osfrv,“ segir Eiríkur.

Hann segir að fílefldir karlmenn hafi skorist í leikinn. „Múslimakonunum mislíkaði eins og gefur að skilja og svöruðu fullum hálsi. Við lá að til handalögmála kæmi og þurftu fílefldir karlmenn að ganga á milli og stilla til friðar. Sem hafðist með erfiðismunum.“