Töluvert af grjóti og drullu gekk á land í óveðrinu á Ólafsfirði í gærkvöldi og í nótt. Meðfylgjandi myndir tók Lára Stefánsdóttir hjá björgunarsveitinni Tindi í morgun en þær sýna glöggt þau miklu áhrif sem óveðrið hafði og þann mikla kraft sem því fylgdi.
Lára sagði í samtali við DV í morgun að töluvert tjón hafi orðið í bæjum, aðallega á fyrirtækjahúsnæði en einnig á íbúðarhúsi. „Ég var að horfa á bæjarskemmuna og þar eru til dæmis farnar hurðar. Við erum svo sem ekki búin að meta tjónið almennt. Nú erum við að bjarga því sem skiptir mestu máli.“
Lára sagðist aldrei hafa upplifað annað eins. „Það er brimvarnargarður hinum megin við húsið hjá björgunarsveitinni og ég hef aldrei séð sjóinn ganga svona yfir hann, stórar holskeflur.“
Lögreglan á Norðurlandi eystra hvatti íbúa á Ólafsfirði í morgun til að vera ekki á ferðinni að nauðsynjalausu. „Járnplötur og brak úr húsum eru á víð og dreif og þá hefur grjót gengið á land. Viljum við sérstaklega nefna Sjávargötu og Námuveg,“ sagði lögregla.
