Það er Sigríður María Eyþórsdóttir sem er skipuleggjandi styrktartónleikanna sem haldnir verða í Grindavík þann 10. desember næstkomandi. „Að tónleikunum stendur úrvalslið Grindvískra tónlistarmanna ásamt fjölda grindavíkurvina sem vill leggja góðu málefni lið,“ segir Sigríður. Fram kemur mikið úrval af tónlistarmönnum sem munu leika og syngja tónlist úr öllum áttum. Tónleikarnir verða haldnir í Netagerðinni- Sal Bryggjunnar í Grindavík og hefjast þeir klukkan 19:00. Aðgangur er ókeypis og öllum opinn, en tekið verður við frjálsum styrktarframlögum á staðnum.
Meðal tónlistarmanna sem fram koma eru: Íris Kristinsdóttir, Dagbjartur Willardsson, Kirkjukór Grindavíkur,3/4 hljómsveit, Pálmar Guðmundsson, Guðjón Sveinsson og hljómsveit, Sólný Pálsdóttir og hljómsveit, Sigga Maya ÓBÓ og Dói, Axel O og Hljómsveitin Kylja.
„Það liggur fyrir að framundan sé langt og strangt endurhæfingarferli hjá Sólrúnu og Rahmon, og er tilgangur tónlekana að létta undir með þeim og fjölskyldum þeirra á þessum erfiðu tímum. Tónleikarnir eru í nafni Sólrúnar vegna tengsla hennar við Grindavík, en allur ágóði rennur að sjálfsögðu til þeirra beggja. Allir sem að einhverju leyti koma nálægt tónleikahaldinu gefa vinnu sína og hefur þáttaka og velvilji farið fram úr björtustu vonum skipuleggjanda.“
Greint var frá ástandi þeirra Sólrúnar og Rahmons í kvöldfréttum RÚV í vikunni. Þar kom fram að Rahmon hlaut bæði annars og þriðja stigs brunasár á rúmlega helmingi líkama sína en Sólrún á um 35% líkamans. Eldurinn kom upp í kjallaraíbúð þeirra við Mávahlíð en Sólrún og Rahmon voru í íbúðinni ásamt eiganda íbúðarinnar. Eigandinn náði að koma sér sjálfur út úr brennandi íbúðinni og hlaut minniháttar áverka. Talið er að eldurinn hafi komið upp eftir að logandi olía helltist úr potti.
„Þau voru sofandi og mér skilst að þegar að þú ert sofnaður þegar svona kemur fyrir, þá er reykurinn það eitraður að hann svæfir þig dýpra þannig að þú vaknar ekkert,“ sagði Þórunn Alda Gylfadóttir, móðir Sólrúnar í samtali við RÚV. Sem betur fer náði þó slökkviliði að koma parinu út um glugga á íbúðinni en þau höfðu þá þegar brunnið mjög illa. „Og í eiginlega þrjár vikur var henni haldið sofandi og hún var í bráðri lífshættu í langan tíma,“ segir Þórunn um ástandið í kjölfar slyssins