39 mál voru skráð í dagbók lögreglu frá klukkan 17 í gær til 05 í morgun. Klukkan 20:30 var tilkynnt um umferðaróhapp við Hlemm þegar ökumaður ók í gegnum rúðu veitingastaðar. Að sögn lögreglu ætlaði ökumaðurinn að rétta bifreiðina af í stæði en ekki vildi betur til en svo að hann ók í gegnum rúðuna. Engin slys urðu á fólki.

Á ellefta tímanum kom nokkuð óvenjulegt mál inn á borð lögreglu. Þar var tilkynnt um menn í áflogum í Hlíðahverfi, en síðar kom á daginn að þarna voru óðamála vinir í innilegum faðmlögum, að sögn lögreglu.

Á þriðja tímanum í nótt hafði lögregla afskipti af 16 ára ökumanni í Seljahverfi í Breiðholti. Pilturinn ungi var kærður fyrir akstur án ökuréttinda og eldri farþegi í bílnum var kærður fyrir að fela unga manninum stjórn ökutækisins. Haft var samband við forráðamann og málið tilkynnt til barnaverndar venju samkvæmt.

Þessu til viðbótar voru fjórir ökumenn stöðvaðir vegna gruns um fíkniefnaakstur. Í einu tilvikinu haldlagði lögregla hníf sem ökumaður hafði meðferðis.