Málið hefur verið umtalað í dag en konan hafði í förum sínum vottorð sem sagði hana ekki vera í ástandi til að fljúga. Þrátt fyrir það var hún flutt á brott en Útlendingastofnun hafði vottorð sem sagði hana geta flogið. Ólétta konan segist þó ekki hafa hitt lækninn sem gaf það vottorð út.
Í kvöldfréttum Stöðvar 2 í kvöld var rætt við starfandi forstjóra Útlendingastofnunar, Þorstein Gunnarsson. Aðspurður um það hvort þetta hafi verið mistök af hálfu stofnunarinnar segir Þorsteinn svo ekki vera.
„Á þessum tímapunkti þá sjáum við ekkert í þessu máli sem við myndum líta á sem einhver mistök. En það virðast vera uppi deildar meiningar um það meðal heilbrigðisstarfsfólks hvernig beri að túlka þetta vottorð og það er klárlega eitthvað sem við munum eiga samtal við heilbrigðisyfirvöld um á næstunni,“
Einnig var rætt við Evu Jónsdóttir, starfandi yfirlæknir fæðingarþjónstu Landspítala, í kvöldfréttunum en vottorð konunnar kom frá Mæðravernd Landspítalans. „Ég get allavega ekki séð að vottorðið hafi verið gefið út í öðrum tilgangi en að gefa það til kynna að við mæltum ekki með því að hún færi í flug í þessum tilgangi,“ sagði Eva í samtali við Stöð 2.