Stuðningsmenn meistaraflokks Vals í handbolta karla eru mjög ósáttir við þá ákvörðun stjórnar félagsins að rifta samningum við leikmanninn Svein Aron Sveinsson. Ákvörðunin var tekin í kjölfar þess að Sveinn Aron var dæmdur í 9 mánaða fangelsi fyrir líkamsárás sem hann framdi á Októberfest fyrir utan Háskóla Íslands haustið 2017.

Í tilkynningu frá aðalstjórn Vals um málið sagði:

„Aðalstjórn Knattspyrnufélagsins Vals hefur fjallað um mál Sveins Arons Sveinssonar leikmanns meistaraflokks Vals í handknattleik, í kjölfar dóms sem hann fékk. Sú ofbeldishegðun sem leikmaðurinn játaði að hafa sýnt er í algjörri andstöðu við allt sem Valur stendur fyrir og hafa því allar forsendur fyrir samstarfi félagsins og leikmannsins brostið. Félaginu er því nauðugur einn sá kostur að rifta samningnum.  Með birtingu fréttar um málið í fjölmiðlum fengu stjórnarmenn Vals fyrst vitneskju um þann verknað sem leiddi til hans.“

Ósáttir og leggja niður kjuðana

„Við undirritaðir skiljum ekki hvernig stjórnarmenn Vals gátu komist að þeirri niðurstöðu að standa ekki á bak við einn af bestu sonum handknattleiksdeildar Vals. Vissulega er slæmt brot framið og hann dæmdur eftir því af dómstólum en að taka menn af lífi innan félagsins er ekki boðlegt að okkar mati. Sveinn Aron er uppalinn Valsmaður með 20 ára flekklausan feril í Val og hefur ekki áður komist í kast við lögin og þeir sem þekkja hann vita að þetta er ekki það sem hann stendur fyrir,“ segir í bréfi sem nokkrir stuðningsmenn Vals undirrita og beint er að aðalstjórn félagsins.

Hafa mennirnir ákveðið að leggja niður sjálfboðaliðastörf vegna málsins og segja það lykta af pólitík:

„Þegar stjórn félagsins starfar svona þá er okkur ekki stætt á að vinna sjálfboðastörf fyrir félagið okkar Valsmanna. Við höfum komið að ýmsum verkum sem sjálfboðaliðar í gegnum árin en þó helst sem trommuleikarar og við því miður leggjum niður kjuðana meðan þessir menn starfa í stjórn félagsins, þannig er það bara.“