Umræðan um stöðu nýs útvarpsstjóra á RÚV hefur verið á vörum margra síðustu daga. Magnús Geir Þórðarson lætur af störfum eftir fimm ár á næsta ári og spyrja ýmsir sig hver arftakinn verði. Hér eru fimm tillögur.

Veitti forsetanum harða samkeppni

Þóra Arnórsdóttir hefur lengi verið talin á meðal betri fjölmiðlamanna landsins. Hún er með B.A.-gráðu í heimspeki frá Háskóla Íslands og M.A.-gráðu í alþjóðastjórnmálum og þróunarhagfræði. Þóra bauð sig fram í forsetakosningunum 2012 og veitti Ólafi Ragnari harða keppni. Hæfnin liggur í augum uppi.

Þekkir vel til

Svanhildur Konráðsdóttir þekkir vel til á RÚV, en hún var sem kunnugt er dagskrárgerðarmaður þar um skeið, áður en hún varð forstöðumaður Höfuðborgarstofu og sviðsstjóri Menningar- og ferðamálasviðs Reykjavíkur. Svanhildur hefur gegnt stöðu forstjóra Hörpu og myndi taka þessari áskorun með trompi og meira en það.

Vinnustaðaskipti?

Nokkuð hefur gustað um Ara Matthíasson í Þjóðleikhúsinu að undanförnu. Hann ætti þó að vera hæfur til að gegna stöðu útvarpsstjóra. Ari var framkvæmdastjóri Þjóðleikhússins árin 2010 til 2015, áður en hann gerðist þjóðleikhússtjóri. Þá var hann framkvæmdastjóri SÁÁ á árunum 2006 til 2009 svo dæmi sé tekið. Hver veit nema þeir Magnús Geir hafi skipti á vinnutitlum?

Fjölhæfar mæðgur 

Kristín Þorsteinsdóttir og Ólöf Skaftadóttir væru kjörnir kandídatar til að brjóta upp á formið og gegna báðar hlutverki útvarpsstjóra. Þar með yrðu tvö blöð brotin í sögu Íslands, þar sem ekki aðeins fyrsta konan yrði ráðin í stöðu útvarpsstjóra, heldur fyrstu mæðgurnar, sem samanlagðar búa að gífurlegri reynslu. Þær Kristín og Ólöf þekkja til útsendinga, ábyrgðarstarfa og fjölmiðlastarfa áreynslulaust og hafa báðar gegnt störfum sem ritstjóri Fréttablaðsins, á sama tíma í þokkabót. Ólíklegri hlutir hafa gerst.