Reykjavíkurborg hefur verið stefnt vegna meintra ólögmætra innviðagjalda sem innheimt hafa verið í tengslum við uppbyggingu á húsnæðismarkaði á undanförnum árum.

Frá þessu er greint í Markaðnum, fylgiriti Fréttablaðsins í dag, en það eru verktakafyrirtæki í samstarfi við Samtök iðnaðarins sem standa að baki stefnunni.

Ljóst er að margir milljarðar eru í húfi og bendir Sigurður Hannesson, framkvæmdastjóri Samtaka iðnaðarins, á að í Vogabyggð nemi innviðagjöld borgarinnar fimm milljörðum króna. Þá er bent á það í frétt Markaðrins að innviðagjald sé enn lagt á uppbyggingarverkefni í borginni á næstu árum og gæti innheimta þess numið milljörðum króna.

Einar Hugi Bjarnason, lögmaður hagsmunaaðila í málinu, segir að engin lagaheimild sé til álagningar innviðagjalds.

„En samt sem áður er farið af stað í milljarðaframkvæmdir með tilheyrandi réttaróvissu. Mér finnst þetta raunar með ólíkindum enda hafði borgin borð fyrir báru varðandi gatnagerðargjöldin. Hún hefði getað nýtt lagaheimildir til að leggja á viðbótargatnagerðargjald en kaus að gera það ekki og fara þess í stað þá áhættusömu leið að leggja innviðagjald á lóðarhafa með einkaréttarlegum samningum,“ segir Einar Hugi við Markaðinn.

Fréttina má lesa í heild hér.