Lögreglumenn á Suðurnesjum veittu bifreið athygli á dögunum þar sem henni var vægast sagt ekið undarlega. Í skeyti frá lögreglunni kemur fram að ökumaðurinn hafi verið stöðvaður til að kanna með ástand hans.
„Hann reyndist í góðu lagi en kvaðst hafa verið að hrista próteindrykk sinn hressilega. Var viðkomandi vinsamlegast beðinn um að aka varlega framvegis og hrista ekki drykki sína á ferð,“ segir lögregla í tilkynningu.
Lögreglan á Suðurnesjum hefur á undanförnum þremur dögum kært á þriðja tug ökumanna fyrir of hraðan akstur. Þar af var einn ökumaðurinn aðeins sautján ára og var brotið tilkynnt forráðamönnum og barnaverndarnefnd. Þá stöðvaði lögregla bifreið á Reykjanesbraut þar sem í henni voru of margir farþegar og sat einn þeirra undir öðrum.
