Nokkuð var skráð í dagbók lögreglu í gærkvöldi og nótt. Rúmlega sex í gærkvöldi var bifreið stöðvuð á Miklubraut í Reykjavík.  Bifreiðinni hafði verið ekið á Strætórein en ökumaðurinn hefur aldrei öðlast ökuréttindi. Fram kemur í dagbók lögreglu að ítrekuð afskipti hafa verið af þessum ökumanni vegna réttindaleysis.

Laust fyrir hálf átta í gærkvöldi var bifreið stöðvuð á Höfðabakka í hverfi 110. Ökumaðurinn reyndi að villa á sér heimildir og gaf aðspurður upp rangt nafn. Hann hefur ítrekað verið stöðvaður í akstri og er sviptur ökuréttindum ef marka má dagbók lögreglunnar.

Bifreið var stöðvuð í Breiðholti um hálf níu leytið í gærkvöldi, en bifreiðin var ótryggð. Því voru skráningarnúmer klippt af. Í dagbók lögreglu stendur að aftur sé um að ræða ítrekuð afskipti af ökumanni, nú einum sem ekur um á ótryggðum bifreiðum sem hann er skráður fyrir.

Rétt rúmlega tíu í gærkvöldi var bifreið stöðvuð í hverfi 105. Ökumaðurinn reyndi að villa á sér heimildir og gaf aðspurður upp rangt nafn. Hann er grunaður um akstur bifreiðar undir áhrifum fíkniefna og ítrekuð afskipti þar sem ökumaðurinn er sviptur ökuréttindum. Var þetta sami ökumaður og var stöðvaður á Höfðabakka þremur klukkustundum fyrr.

Laust eftir miðnætti var bifreið stöðvuð á Breiðholtsbraut.  Ökumaðurinn er grunaður um akstur bifreiðar undir áhrifum fíkniefna, aka ítrekað sviptur ökuréttindum og vörslu fíkniefna.