Félag atvinnurekenda og 25 blómabúðir, þar á meðal Blómaval og Garðheimar, hafa skorað á stjórnvöld að fella niður eða lækka t0lla á innfluttum blómum. Benda þessir aðilar á að innlendir blómaframleiðendur anni ekki eftirspurn. Til dæmis hafi verið skortur á túlipönum á verslunum fyrir síðustu jól og verðið hátt. Háir tollar margfaldi verð á innfluttum blómum og nái ekki fram þeim ætlaða tilgangi að vernda innlenda blómaframleiðslu.

Fjallað er um málið á heimasíðu Félags atvinnurekenda og þar segir meðal annars:

„Það er samdóma álit jafnt innflytjenda sem smásala á blómum, sem Félag atvinnurekenda hefur leitað upplýsinga hjá, að innlend framleiðsla á afskornum blómum anni engan veginn eftirspurn. Fáar tegundir eru ræktaðar á Íslandi í samanburði við það mikla úrval sem er í boði á heimsmarkaði og reglulega vantar blóm af þeim tegundum, þannig að blómaverslanir fá lítið eða jafnvel ekkert af því sem þær panta frá framleiðendum. Fyrir flesta stóra „blómadaga“, til dæmis mæðradag, konudag og Valentínusardag, fá blómabúðir minna af blómum en þær vilja. Þetta væri ekki vandamál ef innflutningur væri frjáls, en ofurtollar setja strik í reikninginn. Núverandi ástand kemur því bæði niður á verði og úrvali.

Eina hugsunin að baki tollum á blóm getur verið sú að vernda innlenda framleiðslu fyrir samkeppni. Háir tollar eru hins vegar á mörgum tegundum blóma, burtséð frá því hvort einhver innlend framleiðsla er á þeim. Nefna má aftur dæmið um fresíur, sem ekki eru ræktaðar á Íslandi. Nellikur eru ekki ræktaðar hér á landi en bera engu að síður 48 króna stykkjatoll á tímabilinu 1. maí til 30. nóvember. Hvaða rök liggja þar að baki? er spurt í bréfi FA.“