Jóhann Elvar Sveinbjörnsson hefur verið ákærður fyrir að ráðast á aldraða konu árið 2017. Í ákæru hans, sem er birt í Lögbirtingarblaðinu, kemur fram að hann hafi veist að konunni, sem er á sjötugsaldri, á heimili hennar með ofbeldi og spreyjað úðaefni í augu hennar. Hann hafi því næst tekið þaðan skartgripaskrín sem innihélt skartgripi að óþekktu verðmæti. Spákonan vildi ekki tjá sig um þessa reynslu sína þegar blaðamaður hafði samband.

Sjá einnig: Spákona í Breiðholti er dópsali: „Hvað margar?“ – Sjáðu myndbandið

DV hefur áður fjallað um umrædda konu en hún er spákona sem seldi DV dauðadópið Contalgin. Það hefur verið vinsælt á íslenskum fíkniefnamarkaði og hefur verið kallað hið íslenska heróín. Contalgin er morfín og skylt heróíni og ætlað til að lina þjáningar krabbameinssjúklinga eða þeirra sem þjást af miklum verkjum.

Jóhann Elvar er ekki einungis ákærður fyrir að hafa ráðist á spákonuna. Hann er ákærður fyrir að hafa rænt Árbæjarapótek í Hraunbæ. Hann er sakaður um að hafa farið þar inn bakdyramegin og veist með ofbeldi að starfsmönnum apóteksins. Hann er sagður hafa hrint konu í gólfið og slegið karlmann í andlitið. Hann ku hafa hótað þeim manni með sprautunál. Í ákæru kemur fram að hann hafi haft á brott með sér talsvert magn lyfja:

„Tekið þaðan 5 pakkningar af lyfinu Fentanyl, 4 pakkningar af lyfinu Norspan (5 mcg), 4 pakkningar af lyfinu Norspan (10 mcg), 2 pakkningar af lyfinu Ritalin Uno (30 mg), 3 pakkningar af lyfinu Ritalin Uno (40 mg), 2 pakkningar af lyfinu methyliphenidate (18 mg), 3 pakkningar af lyfinu methyliphenidate (54 mg), 3 pakkningar af lyfinu Oxycontin (10 mg), 2 pakkningar af lyfinu Oxycontin (20 mg), 5 pakkningar af lyfinu Oxycontin (40 mg), 3 pakkningar af lyfinu Oxynorm Dispersa og 3 pakkningar af lyfinu Contalgin.“

Auk þessa var hann ítrekað tekið undir stýri óhæfur til að stjórna bílnum vegna áhrifa fíkniefna. Hann var einnig gómaður með sex ecstasy töflur í versluninni Tölvutek.