Í sumar tókst erlendum tölvuþrjótum að brjótast inn í tölvukerfi HS Orku og svíkja sem nemur á fjórða hundrað milljóna íslenskra króna út úr fyrirtækinu. Fyrirtækið vonast til að hægt verði að endurheimta upphæðina að verulegum hluta.

Fréttablaðið skýrir frá þessu í dag. HS Orka er að helmingshluta í eigu íslenskra lífeyrissjóða á móti helmingshlut breska sjóðastýringarfyrirtækisins Ancala Partners. Félögin keyptu um 67 prósenta hlut í HS Orku í maí á þessu ári og greiddu um 47 milljarða fyrir. Lífeyrissjóðirnir áttu um þriðjungshlut fyrir.

Í lok ágúst hættu forstjóri, fjármálastjóri og tveir stjórnarmenn störfum hjá fyrirtækinu.

Í skriflegu svari til Fréttablaðsins staðfesti HS Orka að starfsfólk hafi nýlega tekið eftir að brotist hafi verið inn í tölvukerfi fyrirtækisins og þannig hafi tekist að svíkja út verulega greiðslu frá því. Unnið sé með íslenskum og erlendum lögregluyfirvöldum að því að endurheimta féð.

„Fyrir snörp viðbrögð bæði starfsmanna félagsins og lögregluyfirvalda hefur félagið ástæðu til að ætla að stóran hluta fjárhæðarinnar megi endurheimta og líklega geti það dregið umtalsvert úr af leiðingum glæpsins.“

Segir í svarinu að því er fram kemur í Fréttablaðinu í dag.