Stjórn Hvalaskoðunarsamtaka Íslands gagnrýnir Sverri Daníel Halldórsson líffræðing Hafrannsóknarstofnunar í yfirlýsingu sinni.

Samtökin segja ummæli Sverris í sjónvarpsfréttum, en þau segja orð Sverris ekki styðjast við vísindi né rannsóknir. Þar er átt við það þegar Sverrir sagði að sex hvalaskoðunarskip hafi truflað grindhvali sem syntu í land.

Samkvæmt Samtökunum voru engin hvalaskoðunarskip á nálægt hvölunum sem syntu í land og þar að auki hafi rannsóknir Háskóla Íslands bent til þess að skipin hafi lítil sem engin áhrif á hvalina.

Hér að neðan má sjá Yfirlýsinguna í heild sinni.

„Yfirlýsing stjórnar Hvalaskoðunarsamtaka Íslands

Stjórn Hvalaskoðunarsamtaka Íslands lýsir furðu sinni á vangaveltum Sverris Daníels Halldórssonar líffræðings Hafrannsóknarstofnunar í sjónvarpsfréttum í gærkvöldi þess efnis að svo kunni að vera að hvalaskoðunarbátar hafi átt þátt í því að grindhvalir syntu á land við Garð á Reykjanesi föstudaginn 2. ágúst sl.

Orðrétt sagði hann í fréttinni: „En svo frétti ég af hópi sem var inni í Faxaflóanum, sem var sennilega þessi hópur, og það voru sex hvalaskoðunarskip í kringum hann. Þannig að mér finnst nú ekki ólíklegt að það gæti líka truflað þau. Sem sagt hávaði frá skipum,“

Þann föstudag og dagana á undan voru engir hvalaskoðunarbátar nærri grindhvalavöðunni eftir því sem næst verður komist. Nokkrir hvalaskoðunarbátar fylgdust með grindhvalavöðunni sem var í höfninni í Keflavík þann 26. Júlí sl. En þar voru einnig aðrir einkabátar og þá tókst að reka hvalina á haf út aftur.

10 fyrirtæki eru aðilar að Hvalaskoðunarsamtökum Íslands og fylgja þau leiðbeinandi reglum um hvernig siglt er að og með hvölum. Á undanförnum árum hafa hvalaskoðunarfyrirtæki, Háskóli Íslands ásamt erlendum aðilum unnið að rannsóknum á mögulegum áhrifum hvalaskoðunar á hegðun dýranna eins og fæðuöflun og hafa þær leitt í ljós að áhrifin eru lítil eða engin til lengri tíma litið.

Það er ábyrgðarhluti að fulltrúi Hafrannsóknarstofnunar skuli setja slíkt fram á opinberum vettvangi án þess að geta stuðst við vísindi eða rannsóknir máli sínu til stuðnings.

Hvalaskoðunarsamtök Íslands lýsa áhuga sínum á að eiga gott samstarf við Hafrannóknarstofnun á vísindalegum grunni en óska þess að yfirlýsing starfsmannssins frá því í gær verði tafarlaust dregin til baka.“