Nýstofnaður Málfrelsissjóður hefur nú á örskömmum tíma tekist að safna 20.000 evrum, sem jafngildir næstum því þremur milljónum króna.

Fjallað var um Málfrelsissjóðinn í síðasta tölublaði DV. Þar kom fram að sjóðurinn væri stofnaður af þeim Önnu Lottu Michaelsdóttur, Elísabetu Úr Atladóttur, Helgu Þórey Jónsdóttur og Sóleyju Tómasdóttur.

Ástæðuna fyrir stofnun sjóðsins má rekja til dóms sem Hildur Lilliendahl Viggósdóttir og Oddný Aradóttir fengu á sig í meiðyrðamáli fyrr í sumar. Málið var afar umdeilt og margir ósáttir með niðurstöðu þess, sem var meðal annars til þess að sjóðurinn var stofnaður.

Upphæðin sem Málfrelsissjóðurinn hefur nú safnað talsvert er talsvert hærri en upphæðin sem Hildur og Oddný þurftu að borga og því ætti að vera nægur peningur til að setja í önnur verkefni.

Á Facebook-síðu Málfrelsissjóðsins er fjallað um málið, en þar fólk hvatt til að halda áfram að leggja málefninu lið.

„Umræðan um hvernig meiðyrðamálum er beitt gegn málfrelsi á Íslandi hefur stigmagnast á stuttum tíma og við munum ekki láta hér við sitja. Vitneskja um fjárhagslega aðstoð og áþreifanlegan stuðning ykkar sem hafa styrkt sjóðinn tvíefla þolendur í að rjúfa þögnina,“ segir á Facebook-síðunni.