Áslaug Thelma Einarsdóttir, fyrrverandi forstöðumaður einstaklingsmarkaðar hjá Orku Náttúrunnar, hefur stefnt fyrrum vinnuveitanda sínum vegna meintrar mismununar á grundvelli kyns og ólögmætrar uppsagnar. Þetta kom fram í fréttatíma RÚV.
Áslaugu var sagt upp störfum síðast liðið haust. Greindi hún frá því í kjölfarið að uppsögnina mætti rekja til margítrekaðra kvartana hennar undan framkomu yfirmanns, þáverandi forstjóra Orku náttúrunnar Bjarna Más Júlíussonar.
Sjá einnig: Áslaug er konan sem var rekin
Málið vakti mikla athygli í fjölmiðlum. Bjarna Má var skömmu síðar sagt upp störfum og Bjarni Bjarnason forstjóri Orkuveitu Reykjavíkur fór að eigin ósk í leyfi á meðan rannsókn málsins færi fram innan Orkuveitunnar.
Innri endurskoðun Reykjavíkurborgar gerði í kjölfarið úttekt á vinnustaðarmenningu og starfsmannamálum. Samkvæmt niðurstöðu úttektarinnar var uppsögn Áslaugar réttmæt en að sama bragði hefði uppsögn Bjarna Más einnig verið réttmæt.
Sjá einnig: Uppsagir Álaugar og Bjarna metnar réttmætar
Fréttastofa RÚV hafði samband við upplýsingafulltrúa Orkuveitu Reykjavíkur, Eirík Hjálmarsson, sem segir OR hafna kröfum Áslaugar og muni taka til varna í málinu. Orka náttúrunnar sendi yfirlýsingu til RÚV þar sem kom fram að í stefnu bæri Áslaug laun sín saman við laun eins karlkyns stjórnanda sem gegndi forstöðu hjá fyrirtækinu og aðeins hans eins. Hún væri ekki að bera saman laun við aðra forstöðumenn, hvorki karla né konur. Afstaða ON í málinu er að mismunur launa í þessum samanburði hafi verið málefnalegur og hafi Áslaug fengið skriflegar útskýringar á mismuninum.
Áslaug vildi ekki veita RÚV viðtal heldur vísaði á lögmann sinn.
Framkvæmdastjóri ON, Berglind Rán Ólafsdóttir, segir það leitt að standa í þessum sporum.
„Því þessi átök taka auðvitað á alla hlutaðeigandi, einnig starfsfólk Orku náttúrunnar. Fyrst málið er komið í þennan farveg vonast ég til þess að það fái skjótan framgang sem marki þá endalok þess.“
Sjá einnig:
Einar mjög ósáttur: Hjá OR fá dónar og káfarar starfslokasamninga
