Varað er við falsfréttum á samfélagsmiðlum, sérstaklega á Facebook, í nýrri frétt á vef Valitor. Facebook-notendur hafa væntanlega tekið eftir alls kyns færslum þar sem þekktir Íslendingar eru sagðir hafa hagnast vel á viðskiptum með Bitcoin. Þetta er hins vegar ekki rétt, eins og kemur fram á vef Valitor. DV hefur áður sagt frá slíkum svikamyllum en rithöfundurinn landsþekkti, Ólafur Jóhann Ólafsson, virðist vera nýjasta fórnarlamb falsfréttanna.
„Falsfréttir hafa gengið á helstu samfélagsmiðlum, sérstaklega Facebook undanfarna daga. Þar er látið sem þekktir Íslendingar segja frá því í viðtali, hvernig þeir á að hafa hagnast á Bitcoin viðskiptum. Í framhaldinu eru lesendur hvattir til þess að leggja fé inn á ákveðna fjárfestingu með greiðslukortum sínum. Þessar falsfréttir hafa birst í nokkrum útgáfum með mismunandi myndum af viðkomandi einstaklingi,“ stendur í fréttinni og bætt við að til séu dæmi um að fólk láti blekkjast.
„Því miður eru alltaf einhverjir sem falla fyrir svikapóstum og falsfréttum sem þessum. Þeir sem gefa upp kortaupplýsingar ásamt öryggisnúmeri, sem þeir fá sent sem sms í símana sína, eiga á hættu að tapa peningunum þar sem bakfærsluréttur er ekki tryggður á slíkum færslum.“
Starfsmenn Valitor biðja landsmenn um að hafa varann á þegar að kemur að slíkum falsfréttum.
„Fólki er eindregið ráðlagt að falla ekki fyrir þeim gylliboðum sem felast í þessum falsfréttum. Sérstaklega ber að varast „fjárfestingatækifæri“ sem hljóma of vel til að vera sönn.“